ЛИМФОСИТҲО

ЛИМФОСИТҲО (Lymphocytus; аз лимфа ва юн. kytos – ҳуҷайра), як намуди ҳуҷайраҳои сафеди хун. Мансуби лейкоситҳои бедона мебошанд. Л. дар таркиби хуни одами калон 19 – 37%-и миқдори умумии лейкоситҳоро ташкил медиҳанд. Бузургии Л. аз 15 то 13 мкм аст. Л. аз ҷиҳати морфологӣ хурд (диаметрашон 5 – 9 мкм), миёна ва калон (диаметрашон 10 – 13 мкм) мешаванд. Қисми зиёди Л.-ро лимфоситҳои хурд ташкил мекунанд.
Вобаста ба фаъолият се навъи асосии Л. вуҷуд доранд: О-лимфоситҳо, Т-лимфоситҳо ва В-лимфоситҳо. В-лимфоситҳо ба инкишофи иммунитети хилтӣ (гуморавӣ), Т-лимфоситҳо ба инкишофи иммунитети хилтӣ ва ҳуҷайравӣ мусоидат мекунанд. Л. дар раванди кӯчидани бофтаҳои пайвандшуда иштирок менамоянд. Афзоиши миқдори Л. лимфоситоз ва кам шудани адади онҳо лимфоситопения ном дорад.