КАТЕХОЛАМИНҲО

КАТЕХОЛАМИНҲО, моддаҳои аз ҷиҳати физиологӣ фаъол, ки дар организм вазифаи миёнравҳои химиявӣ – медиаторҳо (норадреналин, дофамин) ва нейрогормонҳо (адреналин, норадреналин)-ро иҷро менамоянд. К. аз ҷумлаи унсурҳои асосии мутобиқати организм буда, дар ҳолатҳои стресс фаъолияти пурзӯри онро таъмин месозанд, организмро ба шароити муҳити дохилӣ ва берунӣ мутобиқ мегардонанд. Ихтилоли мубодила ё таносуби байни ҳосил шудану ба маҷрои хун гузаштани К. сабаби сар задани баъзе бемориҳо мешавад. Мас., тағйир ёфтани синтези дофамин дар ташкилаҳои махсуси майна муҷиби халал ёфтани ҳаракат – паркинсонизм ва гиперкинезҳо мегардад. Миқдори нисбатан зиёди К. дар моддаи мағзии ғадудҳои болои гурда ҳосил мешавад. Ниг. низ Адреналин, Дофамин, Норадреналин.