ГИГРОМА

ГИГРОМА (Hygroma; аз юн. hygros – моеъ ва …ома), дар ҷавфи халтаи зулолӣ ё маҳбали пай ҷамъ шудани зардобу луоб ё зардобу моеъи фибринозӣ. Г. бисёр вақт чун падидаи тендовагинит рух менамояд. Ба пайдоиши Г. осеби музмини бофтаҳо, ки одатан ба касбу кори одам вобаста аст, мусоидат менамояд. Г. омоси лӯндаи нарм буда, диаметри он 1 – 5 см мешавад; ҳангоми даст расондан, дард мекунад.
Г.-и хурдро бо дору, Г.-и калонро бо ҷарроҳӣ табобат менамоянд. Фарҷоми беморӣ хуб аст.