Главная / Илм / ДИСПАНСЕР

ДИСПАНСЕР

dispanserДИСПАНСЕР (Dispensarium; аз франс. dispensaire – тақсим мекунам), дармонгоҳ, муассисаи махсуси тиббӣ, ки ба гурӯҳи муайяни аҳолӣ ё беморон ёрии табобатию ҷилавгиранда мерасонад. Д.-ҳои зидди бемориҳои сил, бемориҳои пӯсту узвҳои таносул, омосшиносӣ (онкологӣ), рӯҳию асаб, кардиологӣ ва ғ. мавҷуданд. Д.-ҳое низ ҳастанд, ки шахсони бо варзиши ҷисмонӣ ва спорт машғулро муоина мекунанд.
Вазифаи Д. аз ошкор намудан, ба қайд гирифтан, табобат ва муоина кардани беморони гирифтори амрози дахлдор ё ҳайати муайяни одамони солим, омӯзиш ва беҳтар намудани шароити меҳнату зиндагии онҳо, маорифи санитарӣ, инчунин дарёфти тадбирҳо барои мубориза бо бемориҳое, ки мавриди таҳқиқи ҳамон Д.-анд, иборат аст. Д.-ҳои гуногун дар баробари мақсадҳои умумӣ ҷиҳатҳои хос ҳам доранд. Чунончи, Д.-и зидди сил муоинаи мунтазами флюорографии аҳолиро ташкил мекунад (ниг. Флюорография), шахсони бо беморони сил алоқа доштаро ба қайд мегирад; Д.-и бемориҳои рӯҳию асабӣ экспертизаи психиатрӣ мегузаронад; Д.-и пизишкии варзишӣ назорати духтуриро ба амал мебарорад.
Д. аз кабинетҳои қабули амбулаторӣ, лабораторияҳои ташхиси клиникӣ ва дигар лабораторияҳои махсус, кабинетҳои ташкилию методӣ иборат аст. Бисёр Д.-ҳо статсионар доранд.
Дар Д.-и зидди сил утоқҳои зерин дар назар дошта мешаванд: муолиҷавӣ, педиатрӣ, оториноларингологӣ, рентген, сили устухон, пневмоторакс, физиотерапевтӣ, лабораторияи ташхисӣ, тазриқгоҳ. Дар назди Д.- ҳои калон санатория-профилакторияҳо низ фаъолият мекунанд.
Д.-и омосшиносӣ доир ба тахассусҳои гуногун утоқҳои алоҳида, мас., утоқҳои ташхисоти рентгенӣ, рентгеншифоӣ, бандинагузорӣ, ҷарроҳӣ (барои гирифтани биопсия), лабораторияҳо ва ғ. дорад.
Дар Д.-ҳои амрози пӯст ва зӯҳравӣ дар баробари утоқҳои қабули маризон, ҳамчунин утоқҳои рентгеншифоӣ ва микологӣ, лабораторияҳои ташхисотӣ ва серологӣ мавҷуд мебошанд.
Дар Д.-ҳо барои ҳар наф. маризе, ки ба қайди диспансерӣ гирифта шудааст, варақаҳои махсус тартиб дода, дар онҳо тамоми маълумоти заруриро дарҷ мекунанд.

Загрузка...

Дар борамон Anvar

darksider_5@mail.ru

Инчунин кобед

planet

ЗАМИН – САЙЁРАИ СИСТЕМАМ ОФТОБӢ

Сабабҳои тағйирёбии фаслҳои сол. Аз курси табиатшиносӣ мо медонем, ки Офтоб ин маркази системаи офтобии мо …