ВЕСТИБУЛИТ

ВЕСТИБУЛИТ, илтиҳоби луобпардаи даромадгоҳи маҳбал. Асосан дар занҳои ҷавон ва аз нигоҳи шаҳват фаъол ба мушоҳида мерасад. Ҳангоми В. сӯрохи роҳи пешоб ва маҷрои ғадудҳои бартолинӣ варам мекунад. Мавзеи илтиҳоб сурх ва дардманд аст. Занҳо маҷбур мешаванд, ки аз мубошарат худдорӣ кунанд.
В. метавонад дар заминаи баъзе бемориҳои дигар, мас., кандидоз, табхол, вагиноз, амрози илтиҳобӣ ва ғ. сар занад. Бинобар ин барои раҳоӣ аз он қабл аз ҳама бемориҳои мазкурро табобат кардан лозим аст.