ГЕРОГИГИЕНА

ГЕРОГИГИЕНА (аз юн. geron – пирсол ва hygieinos – шифобахш), як фасли геронтология, ки таъсири омилҳои муҳит (табиӣ, маишӣ ва иҷтимоӣ)-ро ба раванди пир гаштани одам меомӯзад; барои бартараф сохтани таъсири номатлуби онҳо тадбирҳои зарурӣ меандешад.
Г. аз чанд илми мустақил иборат аст. Г.-и иҷтимоӣ таъсири омилҳои иҷтимоию иқтисодиро ба вазъи саломатии пирсолон меомӯзад; мавзӯи тадқиқи Г.-и маишӣ таъсири шароити зиндагӣ ба организми одам аст; Г.-и ғизо масъалаҳои тағзияи оқилонаи одамони калонсол ва пирсолонро ҳаллу фасл менамояд; Г.-и меҳнат оид ба таъсири омилҳои истеҳсолот ба организми одами солхӯрда ё нафақагири коргар тадқиқот бурда, барои одамони пирсол тавсияҳои меҳнатӣ ва беҳдоштӣ таҳия месозад.