Ғолиб Исломов

Ғолиб Исломов (Исломов Ғолиб Қаландарович; 9 ноябри 1947, деҳаи Баррӯшони ноҳияи Рӯшон, ВАКБ) — ҳунарпешаи театр ва синамои тоҷик, Ҳунарпешаи шоистаи Тоҷикистон (1991), Ҳунарпешаи халқии Тоҷикистон (2002).

Фориғуттаҳсили Институти давлатии санъати театрии ба номи А. Луначарскийи шаҳри Маскав (1971). Аз ҳамон сол дар Театри навтаъсиси ҷавонони Тоҷикистон (аз соли 1978 ба номи М. Воҳидов) фаъолияташро шурӯъ кард ва пояш то кунун аз ин даргоҳ канда нашудааст.

Дар қариб шаст спектакл амсоли «Хазони сари роҳ», «Муаллими рақс», «Пирии пурзаҳмат», «Модар», «Ситораи раҳнамо», «Дилшод», «Якпула савдо, садпула ғавғо», «Умед», Дар филмҳои тоҷикии «Чор нафар аз Чорсанг», «Вохӯриҳои кӯтоҳ дар ҷанги тӯлонӣ», «Вохӯрӣ дар дараи марг», «Манзилатон обод бод», «Боз як шаби Шаҳрзод», бисёр саҳнаю намоишномаҳои телевизион нақш офарида, паҳлӯҳои гуногуни ҳаёти қаҳрамононашро ошкор месозад. Зеро ҳар образро тавассути омӯзиши пайваста, ҷустуҷӯи бардавом иҷро мекунад. Хоса қаҳрамонони мусбиро табиӣ меофарад. Саҳмаш дар дубляжи филмҳо ба забони тоҷикӣ калон аст.