ҒАДУД, без, узвҳои ҳайвонот ва одам, ки моддаҳои махсус (гормонҳо, луоб, оби даҳон, мушк ва ғ.) ҳосил ва хориҷ мекунанд. Маҳсули Ғ. дар функсияҳои гуногуни физиологӣ ва биохимиявии организм иштирок менамоянд. Ғ.-ҳое, ки маҳсулашонро тавассути маҷро ба рӯи пӯст ё пардаҳои луобӣ хориҷ мекунанд, ғадудҳои усораи берунӣ ё экзокринӣ номида мешаванд; маҳсули чунин Ғ. усора ном дорад.
Ғ.-ҳое, ки маҷро надоранду маҳсулашонро (инкретҳо ё гормонҳо) бевосита ба хун ё лимфа хориҷ мекунанд, ғадудҳои усораи дохилӣ ё эндокринӣ ном доранд. Баъзе Ғ.-ҳо маҳсули охирини мубодиларо аз хун ҷаббида, безарар ва хориҷ мекунанд (бо ҳамин роҳ организм аз заҳролудӣ ҳифз карда мешавад). Мас., Ғ.-ҳои болои гурда, Ғ.-и арақ, Ғ.-и ашк ва ғ. Усораи аксари Ғ.-ҳо (мас., Ғ.-и баногӯш, зери меъда) аз рӯи таркиби химиявӣ ба сафедаҳо мансубанд; онҳо дар об ҳал шуда, моеъи серозӣ (зардобмонанд) ҳосил мекунанд. Онҳо Ғ.-ҳои сафедавӣ ё серозӣ ном доранд. Ғ.-ҳои луобӣ (мас., Ғ.-и сурхрӯда ё бачадон) мутсин ё моддаҳои луобмонанд хориҷ мекунанд. Аз ҷиҳати сохт Ғ.-ҳо якҳуҷайра ва серҳуҷайра, инчунин найчашакл, ҳубобчамонанд, найчашаклу ҳубобчамонанд, оддӣ ва мураккаб мешаванд.
Ш. С. Анварова.