Азимтарин оят дар Қуръон

Аз Ҳазрати Убай ибни Каъб (раз) ривоят шудааст, ки  Расулуллоҳ (с) фармуд:

• Эй Абӯмунзир, оё медонӣ кадом ояти Қуръон дар назди ту аз ҳамаи оятҳои Қуръон азимтар аст?

Дар посух гуфтам:

• Аллоҳ ва Расулаш (с) беҳтар медонанд.

Дубора Расулуллоҳ (с) пурсид:

• Эй Абӯмунзир, оё медонӣ, ки кадом ояти Қуръон дар назди ту аз ҳамаи оятҳои Қуръон азимтар аст?

Ҷавоб додам, ки:

• “Ояти Курсӣ” аз ҳамаи оятҳои Қуръон бартару азимтар мебошад.

Ҳазрати Убай ибни Каъб (раз) мефармояд: Расулуллоҳ (с) дасти муборакро бар синаам ниҳод ва фармуд:

• Эй Абӯмунзир, ин илму биниш бар ту муборак бод!

Аз ин ҳадис маълум мегардад, ки «Ояту-л-Курсӣ» аз ҳамаи оятҳои Қуръон азимтару бартар мебошад. Ин оят ба ин хотир ба нисбати оятҳои дигар муҳимтару бартар мебошад, ки дар ин оят тавҳиди зоти Илоҳӣ ва сифоти Илоҳӣ баён гардидааст.