КӯЧИДАНИ ШАБАКИЯ

КӯЧИДАНИ ШАБАКИЯ [Ablatio (separatio) placentae], аз рагпарда ҷудо шудани тӯрпардаи чашм. Бештар ҳангоми дараҷаи баланди наздикбинӣ, осеби чашм ва баъзан дар одамони солхӯрда мушоҳида мешавад. Дар натиҷаи меҳнати ҷисмонии вазнин, ҳаракати ногаҳонӣ, афтидан ва лат хӯрдани сар тӯрпардаи чашм медарад ё аз қисми пеши ҷои пайванд канда мешавад. Моеъи дохили чашм ба зери тӯрпарда даромада, онро ҷудо мекунад. Дар ин ҳолат бемор аз пайдоиши шарораҳо, соя ё парда дар пеши чашм ва бад шудани қувваи босира шикоят мекунад. Ҳатман ба духтури чашм (офталмолог) муроҷиат намудан зарур аст, зеро бе табобат беморӣ авҷ гирифта, боиси гум шудани қувваи биноӣ мегардад.
Тавассути ҷарроҳӣ беморро муолиҷа карда, ҷои кандашудаи тӯрпардаро медӯзанд. Барои пешгирии К. ш. дар мавриди наздикбинии дараҷааш баланд ва миёна ба бемор бардоштани бори вазнин, машғул шудан бо баъзе намудҳои спорт (худро ба об партофтан, ба балнадӣ ва дарозӣ ҷаҳидан, бокс) қатъиян манъ аст. Ғайр аз ин, чашмро аз зиёнҳои тасодуфӣ (махсусан дар истеҳсолот) эҳтиёт намудан зарур мебошад. Ниг. низ Чашм.