Барои тайёр кардани таом аз сабзавот ҳамаи намуди коркарди гармро истифода мебаранд. Обпаз, дампаз, буғпаз ва дар оби худпухта. Сабзавоти пухтагиро барои тайёр кардани хуришҳо, шӯрбо, таомҳои 2-ум ва барои гарнир истифода мебаранд.
Тайёр кардани таоми картошкаи обпаз
Таҷҳизот: дег, чавлӣ (друшлаг), тағорача, корди таббохӣ, чангак,
қошуқ, табақ, тахтачаи резакунанда.
Миқдори масолеҳ: картошка – 200 г, равғани маска – 10 г, ё қаймоқ – 20 г, намак – 2 г, пиёзи кабуд, кашнич ва шибит – 3-5 грамм.
Картошкаҳои ҳаҷмаш якхеларо интихоб карда, шуста, пӯсташро тоза кунед. Кабудиро ҷудо намуда шуста ва реза карда, сипас картошкаро ба дег андохта, оби гарм рехта (тахминан 1-1/2 см аз болои рӯи картошка), намак пошида то тайёр шудан пазед. Пухтагиашро бо ёрии чангак муайян кунед. Мӯҳлати пухтани картошка то 20-30 дақиқа.
Баъди пухтан обашро рехта, боз дегро 1-2 дақиқа ба оташ гузоред, то картошка камтар хушк шавад.
Картошкаи пухтагиро ба табақ гузошта, ба болояш равғани маскаи обкарда ё қаймоқ рехта кабудии резакардаро ба рӯяш пошида, ба дастархон медиҳанд. Картошкаи обпазро таоми дуюми гӯшт, гӯшти парранда ё дигар таоми гӯштин додан низ мумкин аст.
Савол ва супориш
- Коркарди гармии сабзавотро гӯед.
- Қоидаҳои коркарди сабзавотро шарҳ диҳед
- Мӯҳлати пухтани сабзавотро гуфта диҳед.