«ИСЛОҲИ ҚОНУН»

«ИСЛОҲИ ҚОНУН», номи китобест, ки аз ҷониби шахси номаълум бар муқобили «Ал-Қонун фи-т-тиб»-и Абӯалӣ ибни Сино навишта шуда будааст. Низомии Арӯзии Самарқандӣ дар бораи «И. Қ.» чунин мегӯяд: «Ва аҷабе, шунидам, ки яке дар ин китоб («Ал-Қонун фи-т-тиб») бар Бӯалӣ эътироз кард ва аз он мӯътаразот китобе сохт ва «Ислоҳи Қонун» ном кард. Гӯӣ дар ҳар ду менигарам, ки мусанниф (нависандаи китоб) чи маътӯҳ (камақл) марде бошад ва мусаннаф (китоби навишташуда) чи макрӯҳ (нафратовар) китобе! Чаро касеро бар бузурге эътироз бояд кард, ки таснифе аз он ӯ ба даст гирад, масоили нахустин ба ӯ мушкил бошад?!».