АУДИОМЕТРИЯ

АУДИОМЕТРИЯ (Audiometria; аз лот. audio – мешунавам ва …метрия), акуметрия (аз юн. akuo – мешунавам), чен кардани қувваи сомеа. Азбаски қувваи сомеа аз рӯи дарки ҳадди садо муайян карда мешавад, А.-ро барои аниқ кардани қувваи пасттарини садое, ки одам мешунавад, мувофиқ месозанд. Усули муқаррарии А. дарк кардани садоҳои гуногуни одам ё камертон аз масофаи ҳархела мебошад (20 – 25 м). Дар шароити муқаррарӣ сомеа ҳамон вақт беиллат ҳисобида мешавад, ки агар одам садои паст (пичир-пичир)-ро аз масофаи 6 – 7 м шунида тавонад. А.-ро асосан бо ёрии асбобҳои махсуси аудиоакустикӣ – аудиометрҳо амалӣ месозанд. Натиҷаи А. дар намуди аудиограмма навишта мешавад. Ҳадди шиддати овозро бо ёрии ҷадвал муайян намуда, бо ҳамин роҳ дараҷаи заъфи сомеаро аниқ месозанд.