АНДРОСТЕРОМА

АНДРОСТЕРОМА, навъе аз омосҳо. А.-ҳо нисбатан кам дучор омада, асосан хоси занҳо (асосан то 35-сола) мебошанд. Дар мавриди А. миқдори гормони ҷинсии мардона – андроген меафзояд. Дар натиҷа дар занҳо қабати равғани зери пӯст кам, мушакҳо калон, овоз дағал ва паст мешавад; дар бадан, дасту пой ва чеҳра мӯйҳои сершумор мерӯянд; ҳамзамон бо ин мӯйи сар мерезад (тоссарӣ падид меояд), ғадудҳои сина тағйир ёфта, ҳайз қатъ мегардад, аъзои таносул ҳаҷман калон мешавад. Сари вақт ошкор ва пешгирӣ кардани инкишофи А.-ҳо аҳамияти калон дорад, зеро аз нисф зиёди онҳо омосҳои саратонӣ мебошанд. Дар сурати бомуваффақият дур сохтани омос, нишонаҳои беморӣ зуд барҳам мехӯранд.