Хамелеон – Зерқатори онҳо

Хамелеонҳо хазандаҳои ба калтакалос монанд буда, ҳаёти болоидарахтӣ мегузаронанд. Хаҷмашон майда ва миёна мешавад. Аксар Намудҳояш 25-35 см., калонаш 50-60 см ва аз ҳама хурдаш 3-5 см дарозӣ дорад. Тана аз паҳлӯхояшон фишурда буда, пойҳои дарозе дорад, ки барои ба танаи дарахт часпида баромадан мувофиқ шудааст.

Панҷаҳояшон ба ду қисм ҷудо шуда, анбӯрмонанданд ва муқобили ҳам барои доштани шоху навда мувофиқанд. Думи дарозашон барои ҳалқавор дошта истодани шохи дарахтон ёрӣ мерасонад. Чашмони калони аз косахона баромада дошта, ҳаракати як чашм ба чашми дигар мувофиқ нестанд, яъне дар як Вақт вай метавонад ду тарафро дида, бештар хӯрок ёбад ё аз душман худро пинҳон кунад. Хамелеон шушашро аз ҳаво пур карда, варам мекунад, ранги баданашро тез тағйир медихад, ки он вобаста ба таъсири равшанӣ, ҳарорат ва вазъияг буда, пигмент мебарорад.

Хамелеонҳо дар Мадагаскар. Африка, Осиёи Хурд, Ҳиндустони ҷанубии Испания бисёр буда, аксарияташон дар ҷангал зиндагӣ мекунанд, ҳашаротро бо забони дарози ёзандаашон лесида мегиранд.