ВАКУУМ-ЭКСКОХЛЕАТСИЯ

ВАКУУМ-ЭКСКОХЛЕАТСИЯ, вакуум-аспиратсия, амалиёти қатъ намудани ҳамли мӯҳлаташ то 12 ҳафта бо роҳи ҷаббида гирифтани ҷанин аз ҷафи бачадон. В.-э.-ро баъди аниқ муқаррар шудани ҳомилагӣ ва вуҷуд надоштани аломатҳои номатлуб (мас., бемориҳои сироятӣ, илтиҳобӣ ва ғ.) ба ҷо меоранд. Қабл аз В.-э. санҷиши бактериологии маводи роҳи пешоб, маҳбал, гарданаи бачадон, таҳлили хун барои аксуламали Вассерман гузаронида мешавад. В.-э. бо риояи тамоми қоидаҳои асептика ва антисептика сурат мегирад. Агар В.-э. дар шароити амбулатория ба амал бароварда шавад, пас зан баъди он бояд дар утоқи алоҳида камаш 2 соат истироҳат намояд. Ҳамаи занҳое, ки В.-э.-ро аз сар гузарондаанд, дар мушоварагоҳи бонувон ба қайди диспансерӣ гирифта мешаванд.