Дар давраи ҳисоботӣ хоҷагиҳои пахтакорӣ ҷумҳурӣ дар масоҳати 185816 гектар кишти пахта гузарониданд, ки нисбат ба ҳамин давраи соли гузашта 11838 гектар, нисбат ба дурнамо 12316 гектар зиёд буда, нисбат ба баҳодиҳӣ 1684 гектар кам мебошад. Кишти пумбадона дар вилояти Хатлон 122404 гектар, вилояти Суғд 57194 гектар ва шаҳру ноҳияҳои тобеи марказ 6219 гектар гузаронида шуд, ки нисбат ба ҳамин давраи соли гузашта дар вилояти Хатлон 2854 гектар, Суғд 6429 гектар ва шаҳру ноҳияҳои тобеи марказ 2556 гаектар зиёд мебошад.
Аз майдони умумии кишти пахта 182350 гектари он дар заминҳои корам, 561 гектар дар заминҳои партов, 1317 гектар дар байни қаторҳои боғҳо, 80 гектар дар чарогоҳ ва 1508 гектар дар дигар заминҳо кишт карда шудааст.
Тибқи маълумоти оморӣ то санаи 10 октябри соли 2018 пахтакорони ҷумҳурӣ 168,0 ҳазор тонна пахта ҷамъоварӣ намудаанд, ки нисбати соли гузашта 111,3 ҳазор тонна ё 39,8 фоиз кам мебошад. Аз ҷумла дар Вилояти Суғд 64,7 ҳазор тонна, вилояти Хатлон 97,5 ҳазор тонна ва НТҶ 5,8 ҳазор тонна, ки нисбати ҳамин давраи соли гузашта, вилояти Суғд 9,6 фоиз, вилояти Хатлон 51,4 фоиз ва НТҶ 18,8 фоиз кам пахта ҷамъоварӣ карда шудааст.
Ҳаҷми умумии истеҳсоли пахта ба ҳолати 10 октябри соли 2018
Вилоятҳо ва шаҳру ноҳияҳо | Соли 2017 | Соли 2018 | Фарқият бо фоиз нисбат соли 2017 |
Ҷумҳурии Тоҷикистон | 279251 | 167996 | 60,2 |
Вилояти Суғд | 71555 | 64691 | 90,4 |
Вилояти Хатлон | 200522 | 97480 | 48,6 |
НТҶ | 7174 | 5826 | 81,2 |
Турсунзода | 3508 | 1739 | 49,6 |
Ҳисор | 2110 | 3043 | 144,2 |
Шаҳринав | 491 | 460 | 93,6 |
Рӯдакӣ | 713 | 468 | 65,6 |
Ваҳдат | 352 | 116 | 33,0 |
Гарм омадани боду ҳаво дар фасли тобистони соли ҷорӣ, инчунин дар сатҳи зарурӣ истифода нашудани тухмии хушсифат ва сари вақт ба анҷом нарасидани кишти пумбадона ҳамчун омилҳои камшавии истеҳсолот арзёбӣ мегарданд.
Дар ин росто, паҳншавии зараррасонҳои пахта дар минтақаҳои ҷумҳурӣ бо тағйирёбии ҳарорати ҳавои тобистони имсола нисбат ба соли гузашта хусусан майдони паҳнгаштаи тортанаккана 8348 гектар ва кирми ғӯза 5632 гектар зиёд ба қайд гирифта шуд, ки барои пешгирии саривақтии паҳншавии зараррасонҳои маккандаи пахта, хусусан тортанаккана дар майдони умумии 89703 гектар коркарди кимиёвӣ гузаронида шуд.
Бинобар ин Вазорати кишоварзӣ якҷо бо мақомоти иҷроияи маҳаллии ҳокимияти давлатӣ бо мақсади расидан ба нишондиҳандаи дурнамо, инчунин пурра ҷамъоварӣ ва нигоҳ доштани ҳосили пахта тадбирҳои заруриро роҳандозӣ намоянд.