Моддаи 10. Фаъолияти эҳсонкорӣ (аз Кодекси Андози Ҷумҳурии Тоҷикистон)
- Фаъолияти эҳсонкорӣ тибқи Қонуни Ҷумҳурии Тоҷикистон «Дар бораи фаъолияти эҳсонкорӣ» амалӣ карда мешавад.
- Барои мақсадҳои андозбандӣ расонидани кўмак (дастгирӣ) ба шахсон фаъолияти эҳсонкорӣ ба ҳисоб намеравад, агар яке аз шартҳои зерин ҷой дошта бошад:
– шахси қабулкунандаи чунин кўмак (дастгирӣ) дар назди шахси кўмакрасон ўҳдадории дорои хусусияти молумулкӣ ё ғайримолумулкиро қабул кунад (ба истиснои ўҳдадориҳои истифодаи мақсадноки маблағ ё молу мулки гирифташуда);
– шахси кўмакгиранда (дастгириёбанда) ва шахси кўмакрасон (дастгирикунанда) шахсони мутақобилан вобаста ҳисобида шаванд;
– агар чунин кўмак (дастгирӣ) ба ҳар шахси воқеӣ ё ҳуқуқӣ барои иштирок дар ҳама гуна маъракаҳои интихоботӣ расонида шавад.