МАЛИГНИЗАТСИЯ

МАЛИГНИЗАТСИЯ ( Malignisatio; лот. maligus – зараровар), бадфарҷомӣ, раванди ба ҳуҷайраи бадфарҷом табдил ёфтани ҳуҷайраи мӯътадили ягон бофта. Зери таъсири омилҳои гуногуни омософар ба вуҷуд меояд, мас., моддаҳои саратонофар, афканишоти ултрабунафш, афканишоти ионнок, омилҳои биологӣ (вирусҳои омософар). Ҳуҷайраҳои осебёфта (ҳуҷайраҳое, ки М. шудаанд) манбаи аввалияи омоси бадфарҷомро ҳосил мекунанд. Ба М. хусусан ҳуҷайраҳои тақисмшаванда ҳассосияти бештар доранд. Гоҳо М.- и омосҳои некфарҷом низ ба мушоҳида мерасад.