ЛИЗОСИМ

ЛИЗОСИМ (аз юн. lysis – ҳалшавӣ ва zyme – туршонӣ), мурамидаза, ферментест аз гурӯҳи гидролазаҳо. Л. девораи ҳуҷайраи бактерияҳоро вайрон карда, боиси ҳал (лизис) гаштани он мешавад. Л.-ро с. 1922 А. Флеминг кашф кардааст. Л. дар ашк, балғам, луоб, зардоб, плазмаи хун, шири занҳо, луобпадраи бинӣ, сипурз, ҷигар мағзи устухон, тағояк, чарбу, лейкоситҳо ва дили одам пайдо карда шудааст; дар растанӣ ва баъзе бактерияю вирусҳо низ дучор меояд. Л.-ро барои табобати бемориҳои чашм, ҳалқ, милки дандон, сӯхтагӣ, инчунин дар амалияи акушерӣ кор мефармоянд.