ЛИМФАНГИИТ

ЛИМФАНГИИТ (Lymphangiitis; аз лимфа ва юн. angeion – раг), илтиҳоби рагҳои лимфа. Л.-и шадид бисёр вақт ҳамчун оризаи бемориҳои илтиҳобии римноки дасту по инкишоф меёбад (захму яраи сироятнок, пучак, хасмол, флегмона ва ғ.).
Л. шабакавӣ (илтиҳоби рагҳои лимфавии хурд) ва бунёдӣ (илтиҳоби як ё чанд раги нисбатан калон) мешавад. Беморон табу тасф мекунанд, уқдаҳои лимфавии ҳамшафат калон мешаванд. Дар сурати номусоид ҷараён гирифтан Л. зардоб ҳосил карда, думбал ё флегмонаҳои зерипӯстиро ба вуҷуд меоранд.
Л.-и музмин метавонад бо илтиҳоби саромосӣ, захмҳои варикозии соқи по ё бемории сил ҳамроҳ шавад. Он боиси халал ёфтани ҳаракати лимфа, варам ва баъзан доъулфил (поғура) мегардад. Беморонро ба назди ҷарроҳ фиристодан лозим аст.