ИНФАНТИЛИЗМ

ИНФАНТИЛИЗМ (Infantilismus; лот. infantilis – кӯдакона, аз infans – гапнозан), як навъ синдромест, ки дар таъхири инкишофи ҷисмонӣ, ҷинсӣ ва рӯҳии хоси синни кӯдакӣ ё наврасӣ падид меояд. И. аз давраҳои зерин иборат аст: ҷанинӣ – дар кӯдакони чала (афгона) ба мушоҳида расидани нишонаҳои ҷанин; инфантилизм ба маънои асосӣ (кӯдакона) – дар кӯдакон маҳфуз мондани нишонаҳое, ки хоси кӯдакони синни ширхорагӣ мебошанд; пуэрилизм – маҳфуз мондани аломатҳое, ки хоси давраи то балоғат дар бачагон ва духтарон мебошанд; ювенализм – маҳфуз мондани аломатҳое, ки хоси давраи ҷавонӣ дар одамони калонсол мебошанд.
Ҷараёни И. қатъи назар аз сабаби пайдоиш музмин аст. Дар мавриди И.-и умумӣ инкишофи ҷисмонӣ, рӯҳӣ ва ҷинсӣ халалдор шуда, одам аз сабзиш мемонад; узвҳои таносул ва аломатҳои дуюмини ҷинсӣ инкишоф намеёбанд, ҷуссаю фикрронӣ кӯдакона аст. Сабаби И.-и умумӣ мумкин бемориҳои музмини узвҳои дохилӣ ва ихтилоли мубодилаи моддаҳо, истеъмоли хӯрокҳои камғизо, заҳролудӣ (дар давраи сабзиши организм) бошанд. И.-и умумии майнаю гипофизӣ ҳангоми осебҳои гуногун, бемориҳои сироятӣ ва рагҳои мағзи сар, ки дар натиҷа фаъолияти гипофиз халалдор мешавад, ба вуҷуд меояд. Барои И.-и ҷинсӣ дар занҳо аменорея ё ихтилоли ҳайз, хуншории бачадон, бенаслӣ, бачапартоӣ ва ғ. хос мебошанд; дар мардҳо бисёр вақт крипторхизм, набудани нуфуз, эҳтилом, азооспермия ба мушоҳида мерасад.
И. дар асоси аломатҳои болинӣ, натиҷаи тадқиқоти гинекологӣ ва урологӣ, муоинаи психиатр ва ғ. ташхис карда мешавад. И.-и ҷинсиро аз рӯи аломатҳои аз сабзиш мондани узвҳои таносул муқаррар мекунанд.
Муолиҷаи саривақтӣ ва босамари И., одатан, натиҷаи мусбат медиҳад.