ГИСТИОСИТҲО

ГИСТИОСИТҲО (аз юн. histion – бофта ва kytos – ҷойгоҳ; дар ин ҷо ҳуҷайра), ҳуҷайраҳои пӯлаи бофтаҳои пайвандии ҷонварони мӯҳрадор ва одам. Г. дар организм вазифаи муҳофизатро иҷро мекунанд. Онҳо заррачаҳои гуногун, аз ҷумла бактерияҳоро дошта ҳазм менамоянд. Г. дар аснои ангезишҳои гуногун, мас., ҳангоми аксуламалҳои илтиҳобӣ фаъол гашта, ба макрофагҳо табдил меёбанд. Г. дар ҷанин аз мезенхима, дар организми болиғ – аз ҳуҷайраҳои бофтаҳои пайвандии пӯла ва баъзе ҳуҷайраҳои хун (лимфоситҳо ва моноситҳо) ба вуҷуд меоянд.