ГИСТИДИН

ГИСТИДИН, аминокислотаи гетеросиклӣ, яке аз 20 аминокислотаҳое, ки протеин ҳосил мекунанд. Дар об нағз, дар этанол бад ҳал мешавад; дар эфир ҳал намешавад. Г.-ро ба таркиби бисёр доруҳои витаминӣ илова мекунанд. Г. яке аз аминокислотаҳои муҳим баҳри сабзишу барқарор шудани бофтаҳо аст. Миқдори он дар таркиби гемоглобин бисёр мебошад. Г.-ро ҳангоми муолиҷаи артритҳои тарбодмонанд, аллергия, захм ва камхунӣ кор мефармоянд. Норасоии он дар организм боиси заъфи шунавоӣ мешавад.