ГИПЕРЕМИЯ

ГИПЕРЕМИЯ (Hyperaemia; аз гипер… ва юн. haima – хун), афзоиши бо хун таъмин шудани ягон қисми рагҳои канорӣ. Г.-и артериявӣ ба таври рефлексӣ зери таъсири омилҳои физикӣ (гармӣ, молиш додан), биологӣ (маҳсули мубодила) ва химиявӣ (скипидар, равғани хардал) ба вуҷуд меояд; он ҳамчунин яке аз аломатҳои илтиҳоб мебошад. Дар шароити физиологӣ Г. ҳангоми фаъолияти пурзӯри узв ба вуҷуд меояд (Г.-и корӣ). Дар аснои маризӣ Г. метавонад баъди ишемияи бофтаҳо, ҳангоми варами Квинке ва ғ. падид ояд.
Г.-и венавӣ бинобар ба варид (вена) фишор овардани омос, ҳангоми нуқси дил ва бемориҳои дигар мушоҳида мешавад. Дар мавриди нуқси дил Г.-и венавӣ бештар дар қитъаҳои аз дил дуртар ба вуҷуд меояд (ниг. Сианоз).