ГИДРЕМИЯ

ГИДРЕМИЯ (Hydraemia; аз юн. hydor – об ва гема…), дар таркиби хун зиёд шудани об. Г. метавонад физиологӣ бошад; дар мавриди якбора ошомидани нӯшокии бисёр ба вуқӯъ мепайвандад. Баъди бисёр талаф додани хун Г.-и ҷубронӣ ба вуҷуд меояд, ки дар натиҷаи он ҳаҷми хуни рагҳо барқарор мешавад. Сабаби Г.-и патологӣ ихтилоли мубодилаи обу намак буда, он ҳангоми гломерулонефрит, нуқси музмин ва шадиди гурдаҳо, нуқси дил ва ғ. рух менамояд.
Барои муолиҷаи Г.-и патологӣ бемории асосиеро, ки сабаби пайдоиши он шудааст, табобат кардан лозим аст.