ГАРМЧАШМА

ГАРМЧАШМА, чашмаи минералии обаш гарм дар ноҳ. Ванҷ. Дар соҳ. чапи д. Ванҷ, 50 км шарқтар аз маркази ноҳия воқеъ аст. Баландиаш аз с. б. – 2400 м. Оби чашма ба воситаи шаш пармачоҳ мебарояд, ки панҷтои он 500 м дуртар аз роҳи мошингард воқеъ гаштааст; дебети умумиашон 20 л/с. Пармачоҳи шашум дар сари роҳи мошингард ҷой гирифтааст; дебеташ зиёда аз 10 л/с (оби он ба д. Ванҷ мерезад). Мавзеи Г. ба шибарзамин табдил ёфтааст. Ҳарор. обаш +210С; минералнокии умумиаш – 1,9 г/л. Таркиби оби чашма аз катионҳои натрий (267 мг/л), калсий (189 мг/л), магний (61,0 мг/л), калий (16,0 мг/л), анионҳои сулфат (683 мг/л), хлоридҳо (281мг/л), гидрокарбонатҳо (268 мг/л), кислотаи силитсий (27,0 мг/л), ҳамчунин оҳан, никел, фтор, бром, маргимуш, руҳ ва сезий иборат аст. Оби чашма ҳамчунин радон (2,8 нКи/л) дорад. Омили асосии шифобахши чашма оби карбонатии дорои сулфатҳо, хлоридҳо, натрий ва калтсий мебошад. Онро метавон барои муолиҷаи холесистит, гепатит, илтиҳоби музмини меъда ва фарбеҳӣ истеъмол кард.
Ад.: Бобоходжаев И.Я., Давлатмамадов Ш.М., Лечебные минеральные источники Памира, Д., 1994.