ГАММА-ГЛОБУЛИНҲО

ГАММА-ГЛОБУЛИНҲО, қисми таркибии сафедаҳои зардоби хун. Г.-г. барои пешгирӣ ва табобати бемориҳои сироятӣ кор фармуда мешаванд. Доруҳои Г.-г.-ро иммуноглобулинҳо низ меноманд. Г.-г. подтанҳои муҳофиз дорад, ки таъсири бемориовари микроорганизмҳоро рафъ менамоянд. Г.-г. вирусҳо, бактерияҳо, спирохетҳо ва соддатаринҳоро нобуд карда, баҳри пешгирию табобати бемориҳои сироятӣ (хусусан амрози кӯдакон) шароити мусоидат фароҳам меоранд. Дар мавриди тазриқ (ба хун гузарондан)-и Г.-г. дар организм иммунитети нофаъол ба вуҷуд меояд.
Одатан, Г.-г.-ро аз хуни одаме, ки гирифтори беморӣ буд, ҳамчунин аз хуни аспе, ки ба он ваксинаҳои махсус гузаронда шудаанд, мегиранд. Г.-г. баъди ҳафтаи дуюми моягузаронӣ (ваксинатсия) ё беморӣ ҳосил мегардад. Г.-г.-ро ба бемор ҳар чӣ зудтар (дар ду рӯзи аввали оғози маризӣ) тазриқ намудан лозим аст. Г.-г. муддати табу тасфро кӯтоҳ, дардро сабук ва оризаҳои бемориро кам мекунанд. Г.-г.-ро бар зидди грипп, сурхакон, ханозир, энсифалити канагӣ, гепатити вирусӣ, ҳасба, нағзак, исҳоли хунин, махмалак, сурфакабудак, сӯхтанӣ ва ғ. истифода мебаранд.