АНГИОМА

АНГИОМА (Angioma; аз ангио… ва …ома), омосест ғайрисаратонӣ. Аз рагҳои хунгузар (гемангиома) ва лимфавӣ (лимфангиома) ба вуҷуд меояд. А. дар узву бофтаҳои гунгогун (пӯст, насҷи зери пӯст, ҷигар, мушакҳо, устухон, майна, гурда) пайдо мешавад; баъзан ба миқдори зиёд нуму меёбад. Дар мавриди бисёр будани А. онро ангиоматоз меноманд. Беморӣ бештар дар кӯдакон ба мушоҳида мерасад. А. омоси шаклу андозааш гуногун аст. Ранги гемангиома сурх ё сурхи кабудча мешавад; лимфангиома омоси беранг мебошад. А.-е, ки бофтаҳои пайвандии бисёр дорад, ангиофиброма меноманд.
Муолиҷаи А. бо усули ҷарроҳӣ аст. Агар бурида дур кардани он имконнопазир бошад, аз термо- ва электрокоагулятсия, криотерапия, табобат бо изотопҳои фосфор, кобалт ва сезий истифода мебаранд. Ниг. низ Омос.